Nenthrapazham Idiyappam – നേന്ത്രപ്പഴം ഇടിയപ്പം.

റെസിപ്പി കണ്ടപ്പോ തന്നെ വായിൽ കപ്പലോടിച്ച് തുടങ്ങീതാ.

ആർത്തി മൂത്ത് പഴം മേടിക്കാൻ അയച്ചാള് കൊണ്ടുവന്നത് അധികം പഴുക്കാത്ത പഴം.

പിന്നെ രണ്ടു ദിവസം വച്ച് നോക്കി നോക്കി പഴുപ്പിച്ചു…

അപ്പൊ റെസിപ്പി…

നേന്ത്രപ്പഴം പഴുത്തത് – 2
പഞ്ചസാര – 3 ടേ. സ്പൂൺ
ഏലയ്ക്കാ – 4
ഗോതമ്പ് പൊടി – 5 – 6 ടേ. സ്പൂൺ
തേങ്ങ ചിരകിയത് – ആവശ്യത്തിലുമധികം
ഉപ്പ് – ഒരു നുള്ള്
നെയ്യ് / എണ്ണ – 1 ടീ. സ്പൂൺ

ഇനി..

▪പഞ്ചസാരയും ഏലയ്ക്കയുടെ കുരു മാത്രം മിക്സിയിൽ നല്ലപോലെ പൊടിച്ച് മാറ്റിവയ്ക്കുക.

▪പഴം നല്ലപോലെ ആവിയിൽ വേവിച്ച് കുരുവും നാരും കളഞ്ഞ് മിക്സിയിലടിച്ചെടുക്കുക.

▪ഇതിലേക്ക് ഗോതമ്പ് പൊടി, പകുതി പഞ്ചസാര, ഉപ്പ് എന്നിവയിട്ട് കുഴച്ചെടുക്കുക. ഗോതമ്പ് പൊടി ആദ്യം 4 ടേ. സ്പൂൺ ഇട്ട് കുഴയ്ക്കുക ആവശ്യമെങ്കിൽ കുറേശ്ശെ ഇട്ട് ഇട്ടിയപ്പത്തിനാവശ്യമായ മയത്തിൽ കുഴച്ചെടുക്കുക.

▪ഇതിലേക്ക് നെയ്യിട്ട് ഒന്നൂടെ കുഴച്ച് മാറ്റി വയ്ക്കുക.

▪ചിരകിയ തേങ്ങയിൽ ബാക്കി പഞ്ചസാര തിരുമ്മി ചേർക്കുക.

▪ഇനി തേങ്ങേടെ ലേയറിട്ട് ഇടിയപ്പം ഉണ്ടാക്കി എടുക്കുക.

കുറിപ്പുകൾ:

✔നല്ല പഴുത്ത നാടൻ നേന്ത്രപ്പഴമാണ് ഏറ്റവും നല്ലത്. നല്ല മഞ്ഞ കളറും ടേസ്റ്റും ഉണ്ടാവും.

✔നെയ്യോ എണ്ണയോ എന്തായാലും ചേർക്കണം. ഗോതമ്പ് പൊട്ടിയായോണ്ട് സേവനാഴിയിൽ ഒട്ടിപിടിക്കും. അതൊഴിവാക്കാനാ.

✔തേങ്ങ ഇഷ്ടമാണെങ്കിൽ നല്ലത് പോലെ ചേർത്തോളൂട്ടൊ.

✔ ഉപ്പും ഒഴിവാക്കരുത്.

✔ഗോതമ്പ് പൊടി കൂടാനോ കുറയാനോ പാടില്ല.
കുറഞ്ഞാൽ പിഴിയുമ്പോ പൊട്ടി പോവും. ഒരൽപം പിഴിഞ്ഞു നോക്കാ. പൊട്ടുന്നുണ്ടെങ്കിൽ അൽപം കൂടി പൊടി ചേർത്തു കൊടുക്കുക.